الشاى باللبن

السبت 11 ديسمبر 2010, 10:16 pm تقييم المساهمة: 100% (1)

صلاح جاهين

أربـع إيـديـن عـلى الفـطــار
أربـع شـفايف يشربوا الشاى باللبن
ويـبوسوا بعض ويحضنوا نور النهار
بـين صدرها وصدره وبين البسمتين
ويحـضنـوا الحب اللى جمعهم سـوا
على الفطـار
ويحـضنوا الشمس اللى بتهز السـتار
وتـخش من بـين الخيوط وبعضـها
مع الهــوا
للأودة تـرسم نفسـها عـلى أرضها
عـلى البساط اللى اشتروه مع الجهاز
على الغرام اللى اشتروه من غير تمن
وعلى القـزاز
ويـشربـوا الشــاى باللــبــن
فى فنجالـين
عــلى الفـطار أربــع إيـديـن
ودبلتـــين
بيـصـحُّوا قـلبى كل ليلة فى المنام
وبـيكتـبولى بـلـون منَـور فزدقى
على الهـوا الاسود وع الجفن اللى نام
كلمة "سلام"

* أغسطس 1952