تقرير عن مباراة الأهلى والزمالك يناير 2018

بداية الحمد لله انا مش زملكاوى ولا أهلاوى ..
الماتش انتهى بفوز الاهلى 3-0
كل التقارير وتحليلات الماتش اتكلمت عن ابداع حسام البدرى ومغامرة او مقامرة ايهاب جلال مدير فنى الزمالك
هنا فى افندينا سبورت ح يكون الكلام مختلف
طبعا كلنا عارفين ان لنا دماغنا ولا بننقل ولا بنقلد حد
احنا مختلفين زى ما انتوا عارفين
المهم الزمالك كان متفوق جدا فى جزئية الضغط على الخصم والاستحواذ على الكورة
لكن كان عنده نقط ضعف كتيرة منها ان دفاعه بطيئ ومفتوح وهجومه غير فعال
يعنى ماكانش عندنا تكليفات واضحة لحد من النص بالتواجد فى منطقة الجزاء مع المهاجم الصريح ( باسم مرسى )
المهاجم الصريح نفسه ( باسم ) غير موفق وغير جاهز
نقط الضعف دى مش خاصة بماتش الأهلى بس
دى خاصة بجميع ماتشات الزمالك السنة دى
نضيف على كده ان الزمالك نفسه نادى غير مستقر اداريا
ونجاح الادارة مهم جدا لأى فريق ...
الأهلى على الجانب الآخر لعب ماتش دفاعى جدا
البدرى كان مرعوب من ايهاب جلال
اوعوا تصدقوا ان البدرى ساب الزمالك يستحوذ بمزاجه زى ما الاعلام بيشيع
البدرى كان ملاعب 4 ثابتين ورا ويدعمهم 3 من نص الملعب عشان يراقبوا
باسم مرسى التعبان
ومحدش يقول لى ان البدرى كان مدرب اللعيبة ان لما ربيعة يطفش الكورة حتقع على رجل وليد
اللى ح يلفها منغير ماتقلش برجله العكسية عشان تروح بالمسطرة لأزارو
جول شكله حلو ووليد ثبت الشناوى لكن نسبة الحظ فيه مش اقل من 80%
ةمحدش يقول لى ان البدرى كان مدرب لعيبته ان الشناوى ح يلعبها وحش لحامد اللى ح يلعبها وحش
فى الوقت اللى لعيبة الزمالك فيه وضعها هجومى بالتالى لما وليد قطع كان كل الجنب الشمال فاضى
يعنى لو الشناوى طفش الكورة اللى رجعتله كان الوضع اختلف خالص
المهم
الاهلى جاب اول جول ورجع لمنطقته بطريقة والله زمان ياسلاحى
مفيش ولا هجمة
مفيش ولا شوطة
مفيش ولا كورة من اليمين ولا الشمال
وفجأة باسم يضيع ضربة الجزاء وفجأة الشناوى يعمل ضربة جزاء يجيب منها الاهلى التانى
ابداع البدرى فين طول الشوط ده ؟؟؟؟
كانت ايه خطته بالظبط
كان خايف من باسم المشلول
ولا حازم الاحول
ولا حفنى اللى مش لائى حد يباسي له
ولا العجان اللى مش لائى حد يرفع له
وناخد بالنا من حاجة
البدرى عمل خطته من قبل ما يشوف اسامى لعيبة الزمالك
يعنى هو نازل ما يتغلبش اصلا بالطريقة الطنطاوية
بكل بساطة البدرى استعار خطة سموحة والمقاصة لما لاعبو الزمالك وغلبوه
ينفع برضو الاهلى يلعب كده مع فرقة ميتة اصلا ؟
الاهلى اقوى من الزمالك فرديا وجماعيا بكتير
الاهلى مستقر جدا اداريا
ينفع البدرى يعمل ماتش زى ده يا بتوع الكورة مع فرقة مفيش منها الرجا ؟
حد طلع قال للبدرى عيب عليك الاهلى يلعب كده !!!!!