بالتفصيل الممل طريقة انشاء منتدى phpBB فى احلى منتدى

السلام عليكم
النهاردة ح اشرح لكم ازاى تعملوا منتدى مجانى على شركة احلى منتدى و الموضوع مفتوح لأى اسئلة و استفسارات .. ياللا بينا :
فى البداية لازم يكون عندك حساب على ياهو مثلا .. يعنى لازم يكون عندك ايميل و طريقة عمل ايميل على ياهو سهلة جدا و مش ح تاخد منك الا وقت بسيط ..

لعمل ايميل على ياهو اتبع الخطوات الاتية :
ادخل على (( هـــــــــــــــذا الرابــــــــــط ))
ح تفتح معاك صفحة تضغط فيها على Create New Account



ح تفتح معاك صفحة جديدة
بس ما تقلقش لو ما لقيتش Create New Account فى المكان المؤشر عليه فى الصورة .. دور عليها فوق او تحت او فى النص او فى اى مكان فى الصفحة اللى عطيتك الرابط ( لينك ) بتاعها .. المهم تلائيها و تضغط عليها و الكلمة دى معناها انك عايز تعمل حساب جديد فى ياهو
يتبع ....

نكمل كلامنا .. ح تفتح معاك صفحة شبه دى :



أول خانة اسمها Name وح تلائى على يمينها مستطيلين اكتب فى اول واحد شمال اى اسم و ليكن mohammad و اكتب فى المستطيل اللى جنبه على طول اى اسم تانى و ليكن aly

تانى خانة اسمها Gender و دى خانة النوع و ح تلائى على يمينها مستطيل اخره سهم باصص لتحت .. لما تدوس على السهم ده ح يطلع لك اختيارات Male يعنى ذكر و Female يعنى انثى و بما ان الكلام هنا عن حد اسمه محمد على يبئى ح نختار Male و الاختيار يكون بالضغط بزرار الماوس الشمال على كلمة Male

تالت خانة اسمها Birthday و دى بتتكلم عن تاريخ ميلادك و ح تلائى على يمينها خير اللهم اجعله خير 3 مستطيلات اول واحد منهم اللى هو جنب الخانة على طول ح تلائيه عبارة عن مستطيل و اخره سهم باصص لتحت .. دوس على السهم و اختار الشهر اللى انت اتولدت فيه مثلا مثلا نختار شهر ديسمبر و ده طبعا ح تلائيه فى اخر قايمة الشهور ..
المستطيل اللى بعده على طول اكتب فيه يوم مولدك و الكتابة ح تكون بالضغط بزرار الماوس الشمال جوا المستطيل ده و تكتب بالكيبورد اليوم و ليكن مثلا 18
و المستطيل اللى بعده على طول يا حبايب عمو ليدر اكيد اكيد ح يكون مطلوب مننا نكتب فيه السنة و بالتالى نضغط بزرار الماوس الشمال جواه و نكتب سنة ميلادنا و لتكن مثلا 1966

رابع خانة اسمها Country و دى مختصة بالبلد اللى حضرتك مقيم فيه و ح تلائى جنبها مستطيل اخره سهم باصص لتحت لما تدوس عليه ح تطلع لك قائمة بأسماء بلاد كتيرة بشويش كده دور على بلدك و اضغط بالماوس عليها و فى حالتنا هنا ح نختار Egypt

خامس خانة اسمها Language و دى خانة اللغة و انا بسيبها English زى ما هى ..
يتبع ...

بعد كده ح يكون عندنا خانات نكتب فيها الايميل و الباسورد



أول خانة ح تلائى اسمها Yahoo ID and Email و ح تلائى جنبها 3 مستطيلات .. أول واحد فاضى و التانى مكتوب فيه yahoo.com@ و التالت مكتوب فيه Chek
و للتسهيل ح نسيب خانة yahoo.com@ زى ما هى و نضغط على كلمة Chek و دى معناها ان ياهو ح يختار لنا ايميل بدل ما نكتب كتير فى الخانة الفاضية و كل مرة ياهو يقول لنا ان الاسم اللى احنا بنكتبوه محجوز و متاخد قبل كده و نكرر المحاولات كتير لحد ما نلائى اسم ياهو يقبله بالتالى ندوس على Chek و نريح نفسنا و ياهو ح يطلع لنا قائمة بكل الايميلات المتاحة

انا اخترت alymohammad93 من الاختيارات اللى ياهو طلعها .. يعنى بصيت على الاسم ده و عجبنى و لئيته سهل بالتالى ضغطت عليه بزرار الماوس الشمال و بالتالى الايميل اللى انا عملته ح يكون alymohammad93@yahoo.com و فاضل نكتب باسورد و نكررها فى الخانة اللى تحتها

نكمل

الخانة اللى بعد كده و اسمها Password و دى ح نكتب فيها الباسورد و ماننساهوش

و الخانة اللى بعد كده ح يكون اسمها Re-type Password و دى بتطلب منك تكرر كتابة الباسورد مرة كمان

يتبع ...

بعد كده شوية اجراءات لتأمين الإيميل عشان لو ضاع أو نسيت الباسورد تقدر تسترجعه تانى من شركة ياهو .. نشوف كده الدنيا ح تمشى ازاى



اول خانة اسمها Alternate Email (optional) و دى ياهو بيقول لك انها بيان اضافى لو مش عايز تكتبه مفيش مشكلة بس من رأى تكتبه لأنه بيان مفيد لو ضاع منك ايميلك او نسيت الباسورد .. الخانة بتطلب منك تكتب ايميل تانى يكون عندك سواء ايميل قديم على ياهو او ايميل على هوت ميل مثلا
يبئى لو عندك ايميل مثلا مثلا على هوت ميل اكتبه فى الخانة دى و اكتبه كامل .. يعنى اكتب مثلا mohammadaly@hotmail.com بس يكون ايميل حقيقى .. ما تكتبش اى كلام و خلاص و لو ماعندكش ايميل تانى سيب الخانة فاضية زى ماهى


تانى خانة اسمها Secret Question 1 و دى بتطلب منك تختار سؤال عشان كده ح تلائى على يمينها مستطيل اخره سهم باصص لتحت لما تضغط عليه بزرار الماوس الشمال ح تطلع لك قائمة اختار منها سؤال
مثلا نختار اول سؤال اللى هو حاليا What is the first name of your favorite uncle? يعنى اسم اكتر واحد من عمامك او خلانك تكون بتحبه

الخانة اللى تحتها على طول اسمها Your Answer و فيها ح تضغط بزرار الماوس الشمال و تكتب اجابة السؤال اللى فات و ليكن مثلا mahmoud

بعد كده ح نلائى خانة اسمها Secret Question 2 و هنا مطلوب مننا نختار كمان سؤال لزوم الحرص و الحركات دى .. ح ندوس على السهم اللى باصص لتحت فى اخر المستطيل زى ما بنعمل كل مرة و نختار سؤال .. انا اخترت تانى سؤال اللى هو What was the last name of your favorite teacher? و هو بيسألك هنا عن الاسم الاخير للمدرس بتاعك اللى كنت ميت فى دباديبه

الخانة اللى بعدها على طول اسمها Your Answer و دى ح نكتبوا فيها اجابة السؤال اللى فات و انا كتبت toty

الموضوع مهم زى ما قلت لكم قبل كده عشان لما الميل يتسرق او تنسى الباسورد تقدر تراسل شركة ياهو و ترجع ايميلك مرة تانية بالتالى نحتفظ عندنا بالبيانات اللى كتبناها و الاسئلة و الاجابات عشان ح نحتاجولها عند اللزوم

يتبع ..

بعد كده ح نلائى :



ح يكون ظاهر عندك صورة تحتها حاجتين مهمين .. اول حاجة لو الصورة الحروف اللى فيها واضحة اكتبهم على طول فى خانة Type the code shown و لو مش واضحة ح تلائى تحت الصورة مباشرة الايكونة دى



و دى فايدتها انك تضغط عليها لما تكون الصورة مش واضحة عشان تطلع لك صورة تانية و بالتالى و فى حالة عدم وضوح الحروف اللى فى الصورة اضغط عليها اكتر من مرة لحد ما تطلع لك صورة الحروف واضحة فيها و اكتبهم فى الخانة اللى قلنا عليها فوق

بعد كده اضغط على create My Account

يتبع ...

بكده ح تطلع لك صفحة ح تلائى فيها على الشمال بياناتك و منها الايميل بتاعك و طبعا اكتبه عشان تبئى عارفه و ح تلائى على اليمين مربع صغير على شمال Make Yahoo! your homepage و جواه علامة صح و دى معناها ان ياهو بيقول لك انه ح يعمل نفسه صفحتك الرئيسية
يعنى لو انت ظابط المتصفح بتاعك انه يفتح على جوجل ح تلائيه ح يفتح بعد كده على ياهو بالتالى اللى مش حابب كده يقدر يشيل العلامة بالضغط جوا المربع الصغير ده و نضغط على continue ح تلائى صفحة الايميل بتاعك اتفتحت و تقدر بعد كده تسجل خروج من الايميل بالضغط على sign out و بكده اقدر اقول لك مبروك عليك الايميل الجديد على ياهو
حاليا مطلوب مننا نكتب الايميل كامل على جنب و نكتب الباسورد .. اوكى ؟
يتبع ..

و الان اقترب موعدنا مع الحلم و امتلاك منتدى مجانى بكل سهولة

ادخل على هـــــــــــذا الرابـــــــــــــط

ده رابط أحلى منتدى و نضغط على طول على احداث منتدى مجانى



ح تفتح معانا صفحة فيها نسخة المنتدى ح يكون ايه و ستايلات المفروض نختار منهم واحد
النسخة اما تكون punbb او phpbb2 او phpbb3 او invision
مش مشكلة الفرق بينهم دلوئت لأن التغيير لأى نسخة فيهم بعد كده سهل جدا
نضغط على phpBB2 و نضغط على اى ستايل يعجبنا .. مبدئيا نختار اى ستايل لان تغييره سهل جدا برضو بعد كده ...و نضغط بعد كده على ( تابع ) من اخر الصفحة تحت خالص ..
ح تفتح معانا صفحة جديدة فيها مجموعة خانات
الخانة الاولى اسمها عنوان منتداك و جنبها مستطيل نضغط جواه بزرار الماوس الشمال و نكتب عنوان المنتدى و ليكن مثلا منتديات بحبك يا بلادى

الخانة اللى بعد كده اسمها وصف و جنبها مستطيل عشان نكتب فيه وصف المنتدى و ليكن مثلا منتديات مصرية لكل المصريين و العرب و نلاحظ هنا ان الوصف يكون فى كلمات قليلة و معبرة عن محتويات المنتدى

الخانة اللى بعد كده اسمها رابط منتداك هو و ح نلائى على شمالها مستطيلين اول واحد من الشمال فاضى و ده نكتب فيه اسم بسيط و سهل الناس تعرفه و ماتنساهوش زى مثلا كلمة masr او كلمة alexlovers او اى كلمة تانية لا تقل عن اربع حروف و تكون بالانجليزى و ح نلائى الخانة اللى جنبها على طول مكتوب فيها forumegypt.net و جنبها زرار عليه سهم باصص لتحت لو دوسنا عليه ممكن نغير forumegypt.net لأى اختيار من الاختيارات الموجودة فى القائمة اللى ح تفتح

الخانة اللى بعد كده هى خانة اللغة و ح نختار العربية

و الخانة اللى وراها هى خانة التوقيت و ح نختار utc + 2 cairo

بعد كده بيانات منشئ المنتدى و ح نكتب الايميل بتاعنا كامل فى اول خانة و نكتب باسورد فى الخانة اللى وراها على طول و نحاول نكتب باسورد مختلفة عن الباسورد اللى كتبناها و احنا بنعملوا الايميل

بعد كده نعمل علامة صح فى المربع اللى جنب ( أنا موافق على القوانين و الشروط - شروط الإستعمال العامة ) بالضغط بزرار الماوس الشمال جواه و نضغط بعدها على (تابع)

اذا كان رابط المنتدى مكرر و موجود قبل كده فى قاعدة بيانات شركة احلى منتدى لما تدوس على تابع ح تطلع لك صفحة تقول لك ان الرابط موجود قبل كده و بالتالى ح يكون عليك تكتب رابط غير اللى انت اخترته .. يعنى مثلا لو كنت كتبت كلمة masr ح تضطر تخلليها مثلا masry أو تكتب اى حاجة تانية مثلا تكتب aboramadan و تنزل تحت تضغط على تابع و فى حالة لما يكون الاسم اللى انت اخترته مش موجود قبل كده فى قاعدة بياناتهم ح تطلع لك صفحة تطلب منك تأكيد الباسورد اللى انت كتبته و بعدها تدوس على تابع ح تطلع لك صفحة تهنئة فيها لينك ( رابط ) منتداك و فيها انك ح تخش المنتدى باسم admin و انك ح تكتب الباسورد اللى اخترتها
ملحوظة مهمة
الايميل بتاعك مهم جدا و الباسورد مهمة جدا جدا عشان لما المنتدى يتسرق منك مثلا او تعمل غلطة تضيع بيها مواضيع و مشاركات كتيرة ممكن تخش قسم الصيانة بتاع شركة احلى منتدى و ساعتها ح يطلبوا منك الايميل اللى انت عملت بيه المنتدى و الباسورد اللى كتبتها عشان يسمحوا لك بالدخول و من ثم استرجاع ما يمكن استرجاعه من بيانات
المهم
دى كانت التجربة بتاعتى و عملت بيها منتدى اسمه منتديات بحبك يا بلادى و ده الرابط http://masreya.forumegypt.net

اضغط على اللينك اللى احلى منتدى عطى هولك فى الصفحة الاخيرة اللى وصلنالها ح يفتح معاك منتدى فيه قسمين و مطلوب منك تسجل دخول طبعا ح تكتب الاسم admin و ح تكتب الباسورد اللى انت كتبتها و انت بتعمل المنتدى

نقول مبروك ؟
يتبع ...

طبعا المنتدى ح يكون محتاج انشاء للاقسام و المجموعات و الرتب و بعض التنسيقات الاخرى

الاقسام احنا عارفينها طبعا .. زى مثلا القسم العام و القسم السياسى و قسم التعارف ... الخ

المجموعات يعنى نعمل نظام ادارى للمنتدى بمعنى يكون عندنا مراقب عام مثلا و مشرف عام و مشرفين و اعضاء و ممكن نعمل تقسم تانى خالص ..

فى ناس بيكون النظام الادارى للمنتدى عبارة عن مجموعات مختلفة مثلا مشرفى القسم العام و مشرفى التطوير و مشرفى الدعاية و ناس تانية تحب تعمل مدير عام و نائب مدير عام و سكرتير مدير عام و مساعد مدير عام و مدير ادارى و مراقب عام و مشرف عام و رئيس قسم ... الخ
المهم لازم يكون فى دماغنا نظام معين نعمله ..

بالنسبة للرتب فدى اللى بتظهر تحت اسماء الاعضاء فمثلا يظهر تحت اسم عضو انه مدير عام و يظهر تحت اسم عضو تانى انه مشرف و عضو تالت يظهر تحت اسمه انه عضو مهم او عضو جديد او نشيط او متميز ... الخ

كده يبئى عرفنا يعنى ايه اقسام و يعنى ايه مجموعات و يعنى ايه رتب

و من المهم قبل ما نعمل اقسام نكون عملنا المجموعات بتاعتنا و عملنا الرتب عشان لما نعمل اقسام نقدر نحدد صلاحيات كل قسم بسهولة فنعمل مثلا قسم ممنوع على الزوار و قسم ممنوع على كل الناس ماعدا المشرفين و قسم خاص بالمديرين بس و هكذا ....

يتبع ......

قبل ما نكمل عايز اقول لكم ان احلى منتدى ح يبعتلك ايميل لما تنشئ منتدى على طول

ده الايميل اللى وصلنى منهم

masreya.forumegypt.net لقد تم انشاء المنتدى.


http://masreya.forumegypt.net لقد تم انشاء منتداك بنجاح. يمكنك زيارته من هذا الرابط

_____________________________
من أجل إدارة منتداك

إسم المستعمل : Admin
كلمة السر : كلمة السر اللتي اخترت لدى انشاء المنتدى

حين الدخول إلى منتداك, لا تنس الضغط على رابطة لوحة الإدارة أسفل الصفحة.
___________________________________

من أجل الحصول على كلمة سر جديدة اضغط على الرابط التالي
http://masreya.forumegypt.net/profile.forum?mode=sendpassword

لا تتردد في استعمال منتدى الدعم و المساعدة العربي الرسمي لطرح أي سؤال متعلق باستعمال منتداك
http://help.ahlamontada.com/


نصائح هامة لبدئ العمل بمنتداك:

1. انشئ الفئات و المنتديات الفرعية التي تود استعمالها
2. أضف بعض المواضيع إلى كل المنتديات الفرعية من أجل إعطاء طابع عام للمنتدى
3. شخص ألوان و مظهر منتداك
4. أخبر أصدقائك و أقاربك عن انشاء منتداك عبر البريد الإلكتروني او الشبكات الإجتماعية
5. سجل منتداك في منتدى الإشهار العربي ليتقاطب عليه الزوار من كل صوب.

نتمنى أن تقضي معنا أطيب الأوقات.
__________________________
ahlamontada.com نتمنى أن تقضوا معنا أطيب الأوقات ... مع أطيب تحياتنا. الطاقم التقني
https://www.ahlamontada.com

انت برضو ح يوصلك ايميل مشابه تماما و الفرق الوحيد بين الايميل اللى وصلنى و الايميل اللى ح يوصلك ح يكون فى لينك المنتدى

كمان عايز اقول لكم على حاجة البعض بيحتاجها
واحد يقول لى و النبى يا عمو ليدر انا ما بعرفش افتح الايميل ازاى
شوفوا
احنا طبعا عملنا ايميل على ياهو
نفتج جوجل و نكتب فى البحث yahoomail و ندوس انتر enter ( من الكيبورد )
و نختار من البحث sign in to Yahoo و غالبا ح تكون اول اختيار فى البحث
لما نضغط عليها ح تفتح معانا صفحة و ح نلائى فيها صورة زى دى



فى الخانة اللى فوق خالص yahoo ID نكتب الايميل بتاعنا من غير yahoo.com@
يعنى مثلا لو ايميلك alymohammad93@yahoo.com يبئى ح تكتب alymohammad93 و اكتب فى الخانة اللى تحتها الباسورد اللى اخترته و انت بتعمل ايميلك
و اضغط بعدها اللى الزرار اللى مكتوب عليه sign in او تسجيل دخول لو الدنيا عندك ماشية بالعربى و ح تبص تلائى ايميلك اتفتح على طول
على الشمال حاجة اسمها inbox لما تدوس عليها ح تلائى اغلب الرسايل اللى بتتبعت لك
و ح تلائى تحتها حاجة اسمها spam و ح تلائى فيها بعض الرسايل اللى بتتبعت لك
و اى رسالة ح تبعتها لحد ح يتشال منها نسخة فى حاجة اسمها sent و ح تلائيها مع انبوكس
و سبام فى نفس الصف و اى حاجة ح تحذفها ح تلائيها موجودة فى trash و دى معاهم برضو

طبعا مش عايزين نتكلم كتير عن الايميل لانه مش موضوعنا فخللينا مركزين مع المنتدى اللى عملناه لان لسه فى شغل كتير مستنينا ...
يتبع ..

قبل ما انسى برضو

واحد يقول عشان خاطرى يا عمو هو ينفع اخش بالايميل ده على الياهو ماسنجر اقول له ايوه حبيبى اكتب ايميلك من غير ات ياهو دوت كوم yahoo.com@ و اكتب الباسورد اللى عملت بيه الايميل و سجل دخول فى الماسنجر و عيش اللحظة

يتبع ...

طبعا انا مش ح اكمل خلاص الا للى يرد على الموضوع بسؤال
يعنى يعمل كل الخطوات اللى فاتت و يعمل منتدى و يبدأ يسألنى اعمل كده ازاى و كده ازاى و هكذا لان انتوا طبعا ما ترضوش انى افضل اكلم نفسى
الموضوع ده للى يعنيه الامر فقط و اللى يعنيه الامر يخش معايا و ينفذ و يسأل و انا ح اجاوب على طول .. اوك ؟

انت شاطر اوى على فكرة

الله عليك يا استاذ ليدر
شرح كامل ووافى
الف شكر
تحياتى يا
كبييييييييير