يعنى ايه فيس بوك

يعنى تكتبى انك عيانه وهتموتى ، وتلاقى الناس عاملالك لايك

يعنى واحد معجب بيكى يرشق على الوول عندك 24 ساعه يشوفك بتعلقى عند مين وبتضيفى مين وبيدرسك من اخلاقك الفيس بوكيه ، ويعد اصحابك الولاد

( يبقى يقابلنى لو عرف يوصل لحاجة)
يعنى زميلك يعلقلك انتى قمر وعسووولة .. يروح العريس الجديد يطفش ويقول البنت مش ولابد وليها أصحاب ولاد بيعاكسوا فيها وفكك منها ياعم

يعنى تنزلى صورة زى الزفت ليكى .. وتلاقى قصايد الشعر والمنافقة هلت وتنسى نفسك وتفتكرى نفسك بريتنى سبيرز

يعنى ايه فيس بوك .. ؟
يعنى تكتبى سينجل يقولوا مبروك .. تكتبى مخطوبة يقولوا مبروك .. تكتبى إن ريليشن يقولوا مبروووك وفى بالهم يقولوا بجـــــــاحه صحيح .. تكتبى اتجوزت محدش يعبرك
يعنى تنزلى أغنية عاطفية تلاقى الاشاعات انتشرت ويقولوا دخلت قصة رومانسية ، وتلاقى نص التعليقات ابتسامات وغمزات .. قال يعنى حد فاهم !
يعنى تانى يوم تشيرى أغنية كئيبة يقولوا يا عينى إنفصلت
يعنى تكتبى استيتس انجلش .. محدش يفهم حاجة ويعملوا لايك قال فاهمين والسلام
يعنى يحصل حالة وفاة و تكتبى ان فلان توفى .. تلاقى الناس بتعزيكى على الوول وتعليقات ومحدش يعبرك بالتليفون ولا يجيلك عزا ولا البيت !!!! .. قال يعنى عملوا الواجب وخلاص .. وياسلام لو حد عمل لايك !!
يعنى واحد لسه خاطب جديد تلاقيه هيمان وطول الوقت عايش فى عيد وينزل أغانى لتامر حسنى وهما مالهم بينا يا ليل لهيثم سعيد تروح ترد عليه هى بأغنية نانسى كل الى فات قبلك مش فاكراه

( الكدابة) وصور قلوب و ورد أحمر قال يعنى مش عارفين الوكسة اللى اتوكسوها وانهم راحوا فى الحديد

يعنى تنفصلى عن واحد بتحبيه تلاقيه يسيحلك فى الاستيتس عنده وكاتب فيكى كلام سخــــــــيف ميغنيهوش حتى أبو الليف , تردى انتى بسلامتك بأغنية سميرة سعيد أنا كتير عليك ، يروح يشيرلك أغنية ايه يعنى لما سبتينى ده حتى دمك مش خفيف وماضيكى مش لطيف

يعنى أصحاب يخسروا بعض عشان هى كتبت تعليق مش لطيف وأحرجتها قدام صاحبها الجديد ، وصاحبتك اللى مش مستظرفاكى ومش طايقاكى تكتبلك اى لاف يوو وميس يوو يا بيبى
يعنى واحد عامل فيها الواد المتدين .. وطول اليوم ترانيم وأيات والبنات تعلق وتقول يا سلام ادى الرجالة ولا بلاش

( يا منافق )
يعنى فجأة .. الكل طلع فاهم فى السياسة وبيشارك فى الحملات الانسانية والتوعية والاقتصادية والوقفات الحزبية ..

(حتى أنا )

يعنى يعجبك ولد أمور عند صاحبتك اللى بيعلق عندها كتير ومعجب ، تروحى بسلامتك تضيفيه من وراها ، وتكدبى وتقولى هو اللى ضافنى
يعنى الولد يحط صورته و هو عالبحر و لابس الساعه السيتنييه او النضاره السينييه ، تروح البنات تضيفه ، وتقول الواد ده هيجيبلى شبكة سينييه ... ماهى ماتعرفش اللى فيها
يعنى جوزك يتخانق معاكى عشان الاستيتس بتاعتك فيها تلميحات انكم متخانقين وبتفضحيه ، وانتى تتخانقى معاه عشان الاستيتس بتاعته فيها تلميحات بفراغة عينيه وان عنده ملل من الجوازه دى !

(صدقينى ياختى مش انتى بس كلهم كده)
يعنى الرجاله تعمل جروبات كتير وصحوبيات كتير ، وتفتح الفيس من الشغل ، وتسيب الشغل وتركز مع المزز الكتير
يعنى تروحى شغلك تقابلى زمايلك .. أو يرن تليفونك وتلاقى بعد جملة صباح الخير .. بقولك ايه شوفتى الاستيتس بتاعتى النهارده ؟ طب علقى عليها !


بجد مش هو دا الى بيحصل
يقطع النت عالنتيت عالي بينتتتوه ههههههههههههههههههههههههههههههه

اممممممممم
طيب قولى لى
تحبى ان حد يعمل كونترول على دخولك النت ( ماما - بابا ززز الخ ) بصفة عامة ؟